håfa na må'pe' taiguihi i finiho'?

kao siña un li’e’ i inasahnge-ña guini na dos sinangan?

ilek-ña, “ti guiya i fafa’na’gue-ku”
ilek‑ña, “ti guiya i fafa’na’gue‑ku”

…

kao un li’e’?… chagi ta’lo yan i dos sinangan gi papa':

…hu alíligao i tilifon-hu sa’ maleffa yu’ månu na hu po’lo. si nanå-hu yan si tatå-hu ilek-ñiha na…
…hu alíligao i tilifon‑hu sa’ maleffa yu’ månu na hu po’lo. si nanå‑hu yan si tatå‑hu ilek‑ñiha na…

…

ya håfa på’go? i taimanu mali’e’‑ñiha i sinangan siha siempre dipende gi kao un tátaitai ini gi tilifon‑mu pat achok håfa na fina’Device sa’ siña ti chumilong gi i dos. ya pues an ti annok, bei sangåni hao: sahnge i dollan siha guihi na dos sinangan.

atan hulo’ ta’lo gi i mina’dos ya lipåra na kalan må’pe’ i finé’nana na sinangan gi " …ilek-ñiha… " (ya fa’na’an guini lokkue’), lao ti taiguihi gi i mina’dos. an ti á’annok ha’, yemme’ guini ya atan i asahnge‑ña.

håfa na må’pe’ taiguihi i finiho’? maila’ ya bei na’tungo’ hao.

put i finé’nana siha na sinangan guihi hulo’, hu yemme’ ha’ i dollan gi i tekla¹ ya mafa’na’an eyu “hyphen-minus” – eyi i “standard” na dollan gi kanna’ todu i tekla gi hilo’ tåno’. lao put i mina’dos siha, hu na’setbe eyi i “non‑breaking hyphen”. i “non‑breaking hyphen” muna’tungo’ i kompiuta na ti siña må’pe’ i finiho’ – mungnga må’pe’ ya po’lo gi mámaila’ na lucha.

gi minagåhet, ti inistotba yu’ mampos nu eyu. lao ginen på’go hu lipåra na sigi må’pe’ i finiho’ taiguihi, kalan ti siña hu fatåni 😅. ti hu tútungo’ nåya kao bai na’setbe i “non-breaking hypen” gi todu i tinige’‑hu, lao guini na tinige’ hunggan.

ya på’go manháhasso yu’ nu i otro simbolu siha ni ta na’sésetbe gi fino’‑ta sa’ ombre…kao un tungo’ na guaha meggai na simbolun glota? guaha:

• ’ – i “apostrophe” (i glota gi i teklan kompiuta‑ku)
• ‘ – i “left single quotation mark” (i “default” na glota gi i teklan tilifon‑hu, lao siña ma’ayek otro)
• ’ – i “right single quotation mark”
• ` – i “grave accent” pat i “backtick” (gaige ini gi tekla gi papa’ i “ESC”)
• ʻ – i “modifier letter turned comma” (iniguiya i ʻokina gi fino’ Hawaiian)

…yan lámeggai 🫨.

fa’na’an gi otro na ha’åni, bei fångge’ put i matkan umádingan sa’ ombre…guaha na biåhi, inistotba yu’ an måkpo’ i sinangan yan i glota ya hu na’setbe i matkan umádingan ya kalan umá’apacha i glota yan i matka.

put ehemplo, atan ha’ in –> “ya éyugue’ i mås månnge’ gi hilo’ tåno’”.

ti hu tungo’ håfa na inistotba yu’, lao hunggan! 😅 kalan mampos ákihot i glota yan i matka. ti fehman na yinaoyao lao ombre… håfa mohon?

pues anyways, enao ha’ nu på’go! an guaha hinasso‑mu siha nu in, na’tútungo’ yu’ fan :D

STA!